ماڵپه‌ڕی ئاسووده‌

دارین سەردەكەوێ

aba_ashq2009 — Tue, 20 Apr 2010 12:32:29 GMT

رووداو - سوێد
هونەرمەندی لاوی نێوداری كورد دارین زانیار لە سوێد، ‌بەشداریی لە پێشبڕكێی گۆرانی یۆرۆڤێرژنی ساڵی 2010 دەكات كە لەئۆسلۆی پایتەختی نەرویژ ساز دەكرێت.
دارین زانیار لە مانگی 5/2010 وەك هاووڵاتییەكی سوێدی و كورد بەشداریی لە پێشبڕكێی گۆرانی یۆرۆڤێرژنی ساڵی 2010 دەكات كە لەئۆسلۆی پایتەختی نەرویژ ساز دەكرێت. ساڵی رابردوو هونەرمەندێكی نەرویژی بەنێوی (ئەلیكسێندەر ریباك) توانی پلەی یەكەمی ئەو پێشبڕكێیە بەدەستبێنێت، بەڵام ساڵی رابردوو دارین بەشداری ئەو پێشبڕكێیەی نەكردبوو بۆیە واچاوەڕوان دەكرێ دارین ئەو پێشبڕكێیە بباتەوە. دارین بەنیازە بە گۆرانی You Out Of My Life بەشداری پێشبڕكێیەكە بكات.

كچە كوردێك لەسەر دەف ژەنین بە 11 ساڵ سزا دەدرێ

aba_ashq2009 — Tue, 20 Apr 2010 12:27:10 GMT

رووداو – ئامەد
دادگایەكی توركیا سزای11 ساڵ و 8 مانگی بەسەر كچە دەفژەنێكی كورددا سەپاند، بە تۆمەتی ئەوەی بانگەشەی بۆ پارتی كرێكارانی كوردستان كردووە. بەڵام پارێزەرەكەی تێهەڵچوونەوەی بۆ حوكمەكەی كردووە.
هونەرمەندی دەف ژەن، چیچەك تەكدەمیر، ئەندامی ناوەندی كولتوور و هونەریی بەهار BKSM، لەسەر ژەنینی دەف سزای 11 ساڵ و 8 مانگ زیندانیكردنی بەسەردا سەپێندرا، وێڕای ئەوەش سزای 5 ساڵ قەدەخەكردن لە چوونە قاوەخانە و بەشداریكردن لە شایی بەسەریدا سەپێندراوە.
تەكدەمیر 4 مانگ لەمەوبەر بەشداری ئاهەنگێكی كردبوو لەو ئاهەنگەدا دەفی ژەنیبوو، بەڵام دواتر لەلایەن پۆلیسی توركیا دەستگیركرا بە تۆمەتی ئەوەی لەو ئاهەنگەدا ناوی PKKی هێناوەو یاسای پێشێلكردووە، بۆیە ئەو سزا قورسەی بەسەردا سەپێنراوە.
مەسعود بەشتاش، پارێزەری چیچەك تەكدەمیر، رایگەیاند "لەم ساڵانەی دواییدا لەتوركیا سزا بەسەر ئەو كەسانەشدا دەسەپێنرێ، كە سەما دەكەن یان فیكە لێدەدەن یانیش دەف دەژەنن. مرۆڤ هیچ بڕوایەكی بە یاسا نەماوە".
دووەمین دانیشتنی هونەرمەند چیچەك تەكدەمیر، لە لقی پێنجی دادگای سزا قورسەكانی ئامەد بەڕێوەچوو. لەو دانیشتنەی دادگادا مەسعود بەشتاش، بەرگری لە هونەرمەند چیچەك كرد و گوتی "چیچەك تەكدەمیر لەئاهەنگ و چالاكییە یاساییەكاندا بەشداری كردووەو شتێكی رەوای كردووە، لێدانی دەف تاوان نییە"، پارێزەر بەشتاش، ئاشكرایكرد كە هەتا ئێستا بەهۆی سەماكردن، فیكە لێدان و هەڵبڕنی هەردوو پەنجە وەك هێمای سەركەوتن سزا بەسەر دەیان كەسدا سەپێندراوە "ئەو كارەش بڕوای تاكەكان بەرامبەر یاسا كەم دەكاتەوە".

ناشڤیل، پایتەختی كوردان لە ئەمریكا

aba_ashq2009 — Tue, 20 Apr 2010 12:24:26 GMT

رووداو -ئەمریكا
شاری ناشڤیل لە ولایەتی تەنەسی بەوە ناسراوە كە شاری موزیكە، بەڵام ئێستا وادیارە ئەو شارە رۆڵێكی دیكەی هەیە. دوای ئەوەی لەساڵی 2008 كەناڵێكی تەلەڤزیۆنی بەرنامەیەكی دیكۆمێنتاری لەسەر ئەو شارە بەناوی (دراوسێی تەنیشتتان) پەخشكرد، لەو كاتەوە ئەو شارە بە "شاری ماڵی نوێ" ناسرا، لەبەرئەوەی باوەشی بۆ چەندین خێزانی پەناخواز و ئاوارە كردووەتەوە. لەو فیلمە دیكۆمێنتارەدا شێوازی ژیانی كورد لە ئەمریكا بەشێوەیەك پیشاندەدات كە كۆمەڵێكن زۆر سوپاسگوزار و ماندوون و زۆر بە شانازیەوە سەركەوتنەكانیان لە كۆمەڵگەی ئەمریكیدا پیشاندەدەن.
لە بەهاری رابردوو تێنسییەكان رایانگەیاند كە ولایەتەكەیان بووەتە پەناگەیەكی نوێ بۆ پەنابەران و بەپێی قسەی رۆژنامەنووسێكی ئەمریكی لە سەرەتای ساڵی 1990 ولایەتی تێنسی نزیكەی 200 هەزار پەنابەری لەباوەشگرتووە. بەتایبەتی لە نێوەڕاستی ئەو ولایەتەدا كە گروپێك خۆیان لە پارچەیەكی شاری ناشڤیڵ كۆكردووەتەوە ئەو ناوچەیەیان ناو ناوە "كوردستانی بچووك" و، بەپێی قسەی كوردێكی ناشڤیڵ بەناوی موەفەق محەممەد، ژمارەی كوردانی ئەو ولایەتە نزیكەی 11 هەزار كەسە.
دەرهێنەرێكی ئەمریكی بەنێوی ویڵ پێدیگۆ كە بەشداری لەو فیلمە دیكۆمێنتارەدا كردووە دانی بەوە دانا كە ئێستا شاری ناشڤیڵ وەكو پایتەختی كوردانی ئەمریكای باكوورە و زۆربەی كوردانی ئەو شارە كوردی باشوورن. بەپێی قسەی چەند ئەندامێكی رێكخراوی لاوانی كوردی ئەمریكی، لەگەڵ ئەوەی زۆرینەی كوردانی ئەمریكا لە تێنسین، بەڵام ژمارەیەكی زۆری كورد لە ولایەتەكانی وەك كالیفۆرنیا، ماساچوسێت، نیوجێرسی، نیویۆرك، تێكساس و ڤێرجینیاش هەن.
مێژووی زۆربوونی كورد لە ئەمریكا دەگەڕێتەوە بۆ ساڵی 1976، كاتێك چوار شەپۆلی ئاوارەكانی كورد، راستەوخۆ هاتنە شاری ناشڤیڵ. ئەوكات خێرخوازانی كاسۆلیكی تێنسی بەرپرسیاربوون لە خزمەتگوزاری ئاوارە و پەنابەران.
پاشان چەندین كوردی عێراق هەر لەو ساڵەدا گەیشتنە ئێرە و پاشان شەپۆلی دووەمی پەنابەران لەساڵی 1979دا هات، كاتێك كوردانی ئێران گەیشتنە ئێرە، ئەمەش دوای شۆڕشی ئیسلامی لە ئێران.
سێیەم شەپۆل لەساڵی 1991 و 1992 بوو كە ئەمەیان گەورەترین شەپۆل بووە هەتا ئێستا، ئەو ئاوارانەی لەو شەپۆلەدابوون، بریتیبوون لەو كوردانەی لەدەست هەڵمەتی ئەنفال و جینۆسایدكردنی كورد هەڵاتبوون.
دوا شەپۆلی هاتنی كوردان بۆ ناشڤیل لە ساڵانی 1996 و 1997 بوو كە لە دەرئەنجامی شەڕە خوێناوییە نێوخۆییەكەی نێوان پارتی و یەكێتی بوو. زۆربەی ئەو رێكخراوە ئەمریكیانەی لەو هەرێمەدا كاریان دەكرد، بەهۆی ئەو شەڕەوە كشانەوە و ئەو كارمەندە كوردانەشیان لەگەڵ خۆیاندا هێنا كە كاریان لەگەڵ ئەوان دەركرد

لەگەڵ ئەوەی هەر چوار شەپۆلەكە لەیەكچوونێكیان پێوە دیاربوو، بەڵام هیچ كام لەو شەپۆلانە ئاسان نەبووە بۆ پەنابەرانی كورد و تەنانەت زۆربەشیان تاوەكو ئەم رۆژە بەهۆی ئەو ئەزموونە تاڵەی ئەوكاتە چێشتوویانە، هێشتا كاریگەری لەسەریان ماوەتەوە.
رەنگە یەكێك بتوانێ ئەوە بڵێت كە ئامانجی هاتنی كورد بۆ ئەمریكا، وەك پەنابەرانی وڵاتانی دیكە نەبووە، ئامانجی كورد ئەوە نەبووە لە دەست هەژاری هەڵبێ و بەدوای خەونی ئەمریكادا بگەڕێت، بەڵكو مەبەست لەوە بووە كە لەدەست دەوڵەتەكانی ئەو ناوچەیە رزگاریان بێت كە بۆ چەندین ساڵە كوردی ئەو چوار بەشەی توركیا، عێراق، ئێران و سووریا دەچەوسێننەوە.
كوردستانە بچووكەكەی شاری ناشڤیل، كۆمەڵگەیەكی بچووكی كوردییە و زۆربەی كوردانی ئەو شارە، كاریان هەیە و بازرگانی دەكەن. ژمارەیەك كورد هەن كە بە مەبەستی نزیكبوونەوە لە كوردانی دیكە، لە شارەكانی دیكەی ئەمریكاوە روویان كردووەتە ناشڤیڵ.
نیك عارف یەكێكە لەو كوردانەی كە لە شارێكی دیكەوە هاتووە. ئەو لە شاری ئەلیزۆناوە هاتووە بۆ ئەوەی لە ناشڤیل بازرگانی بكات.
بەپێی قسەی درو جۆبرا، رۆژنامەنووسی شاری ناشڤیڵ، پەنابەرە كوردەكان كە زۆربەیان كاری حكوومیان هەبووە لە وڵاتی خۆیان، كاتێك هاتوونەتە ئێرە، پێویستبووە كاری دەستی بكەن و كرێی رۆژانەشیان ئەوەندە زۆر نەبووە، بەڵام سەرەڕای ئەو هەموو گیروگرفتە كوردەكان رێگەیان دۆزیووەتەوە بۆ ئەوەی داهاتوویەكی پڕشنگدار و سەركەوتوو بۆ خۆیان دابین بكەن.
جوبرا دەڵێ كە كوردەكانی ئەمریكا یەكێكن لەو كۆمەڵانەی كە بەسەركەوتوویی توانیویانە تێكەڵاوی كۆمەڵگەی ئەمریكی ببن و بتوانن بەشداری لە پێشخستنی ئەو كۆمەڵگەیەدا بكەن.
لەگەڵ ئەوەی نزیكەی 40 هەزار كورد ئێستا لە ئەمریكا دەژین و زۆربەیان جێی خۆیان كردووەتەوە و تێكەڵاوی ئەو كۆمەڵگەیە بوون، بەڵام ئەمەش بە مانای ئەوە نایێت كە ئەوان دووچاری هیچ كێشەیەك نەبوونەتەوە. هەر لەو بەرنامەیەشدا بەدیدەكرێت كە زۆربەی ئەو رزگاربووانەی لە دەست هەڵمەتی ئەنفال قووتاریان بووە هەتا ئەمڕۆكەش باری تەندروستیان باش نییە.
كێشەیەكی دیكەی كوردانی ناشڤیڵ، دروستبوونی گرووپی چەتەی كوردی "كوردیش پڕاید گانگز"ە و ئەم گرووپە پەیوەندی بە ئەنجامدانی چەند تاوانێكی گەورەوە هەبووە. ژمارەی ئەندامانی ئەو گرووپە بەتەواوی دیار نییە، بەڵام پۆلیسی شاری ناشڤڵ پێیوایە نزیكەی 20 تاوەكو 30 مێردمنداڵ دەبن. پولیس نازانێ سەرەتای دروستبوونی ئەم گرووپە یاخود ئامانجی ئەم گرووپە چییە، بەڵام لەو بڕوایەدان كە رەنگە خۆ سەلماندنی كوردان بێت لەسەر شەقامەكانی ناشڤیڵ بەرامبەر گرووپی چەتەی نەتەوەكانی دیكە وەكو گرووپە چەتەكانی ئەمریكای لاتینی و مەكسیكییەكان. ئەندامانی كۆمەڵەی كوردانی ناشڤیڵ نیگەرانی خۆیان بەرامبەر كاری ئەو گرووپە دەربڕیووە و پێیانوایە كە ئەو گرووپە ناو و وێنەی كوردیان لە ئەمریكا پیسكردووە.
سەرەڕای ئەو كێشە كۆمەڵایەتیانەی كە دووچاری كورد دەبنەوە، بەڵام هێشتا زۆر لە كوردان بەپەرۆشن بۆ ئەوەی كۆمەڵەیەكی پۆزەتیڤ و پتەو لە ئەمریكا دروست بكەن.
تاهیر حوسێن سەرۆكی كۆمەڵەی كوردانی ناشڤیڵ رایگەیاند كە ئەو هەوڵانەی كورد لە ناشڤیل زۆر ئاسانترە، لەبەرئەوەی ناشڤیڵ بەشارێكی ئایینیش ناسراوە و ئەمەش بۆ كوردە ئاین پەروەرەكان سەرنجڕاكێشە.
بەرنامەی (دراوسێی تەنیشتتان) ئەوە پیشاندەدات كە چۆن كوردانی ئەمریكا هەمیشە ویستوویانە كولتووری خۆیان بپارێزن. ئەمەش ئەو سوپاسگوزارییەی كورد پیشاندەدات كە ئەم هەلەیان بۆ رەخساوە، هەربۆیە ئەو پرۆگرامە زیاتر جەخت لەسەر خالە هاوبەشەكانی كورد دەكات كە ئەوانەش بریتین لە: پەرەوەردە، یەكانگیریی خێزان، پارێزگاریكردن لە ناسنامەی نەتەوەیی، بەڵام گەورەترین خاڵی تێكەڵاوی كورد بۆ نێو كۆمەڵگەی ناشڤیل ئەوەبووە كە ویستوویانە تێكەڵاوی كۆمەڵگەیەكی نوێ ببن و بەشداری لەپێشكەوتنی ئەو كۆمەڵگەیەدا بكەن.
لە ماڵپەڕی thecommentfactory.com –ی ئەمریكی وەرگیراوە

بەریتانیا 70 كوردی گیراو دەنێرێتەوە

aba_ashq2009 — Tue, 20 Apr 2010 12:20:48 GMT

پۆلیسی بەریتانیا ئەو مانگە زیاتر لە 70 پەناخوازی كوردی باشووری كوردستان دیپۆرت دەكاتەوە. بەپێی ئەو زانیاریانەی لەلایەن فیدراسیۆنی سەرانسەریی پەنابەرانی عێراقی راگەیێندراون، زیاتر لە 70 پەناخوازی باشووری كوردستان كە ماوەیەك لەلایەن پۆلیسی بەریتانیاوە بەمەبەستی ناردنەوەیان خروانەتە زیندانەوە رۆژی 7ی ئەو مانگە لەرێگەی فڕۆكەخانەی نێودەوڵەتی سلێمانییەوە دەنێردرێنەوە كوردستان. ئەو فیدراسیۆنە داوا لە حكومەتی هەرێمی كوردستان دەكات بەو بڕیارەی حكومەتی بەریتانیا رازینەبێت .
رووداو -بەریتانیا

هونەرمەند دیاری قەرەداغی بۆ گوڵان: لە پشت هەموو بێدەنگییەكەوە هەرای ئیشكردن و بەردەوامی هەیە

aba_ashq2009 — Tue, 20 Apr 2010 12:08:37 GMT

دیاری قەرەداغی بە زمانێكی جیاو بە هونەرێكی جیاوازترەوە خزمەتی هونەری كوردی دەكات. خاوەن فەنتازیاو داهێنانێكی گەورەیە لە هونەری كوردیدا، بۆیەش هونەرمەند دیاری توانیوویەتی ببێتە خاوەنی پێگەی بەرز لە ناو هونەری كوردیدا، زۆر كەس هەن دەڵێن و دەپرسن بۆچی خەم یەكێكە لە شتە بەردەوامەكانی ئەو هونەرەی پێشكەشی دەكات، چونكە هەمیشە لە كارەكانیدا هەست بە خەمێك دەكرێت، خەمێك كە دەربڕێكی راستەقینەی ئەو واقیعەیە كە مرۆڤ هەستی پێدەكات لە هەستی دووری و خۆشەویستی بۆ وڵات و دایك و یار و یاخود نیشاندانی ئازارەكانی گەلی كورد كە بە تەواوی وەك خۆی گوزارشتیان لێدەكات و بیسەرێك دەخاتە نێو واقیعەوە، هونەرمەند دیاری قەرەداغی جگە لەوەی سەرقاڵی كاری هونەری خۆیەتی بەڕێوەبەری بەڕێوەبەرایەتی هونەرەكانی موزیكە لە سلێمانی، هەر بۆیەش بە چاكمان زانی بە چەند پرسیاریك ئەم هونەرمەندە خۆشەویست و قەدر گرانە بەسەر بكەینەوە .
دیمانە : سۆران مارف كریم
Soran_marf1980@yahoo.com
* دیاری قەرەداغی چۆن باس لە ئاستی هونەری كوردی دەكات؟
- دەرگایەكی گەورە و كراوەیە بە رووی هەموواندا، هەموو بە ئاسانی پێیدا رەت دەبین و زۆرمان تێدا ون دەبین و نازانین چۆن تێیدا هەنگاو بنێین، زۆری تریشمان لەو رێگایەدا گوڵی جوانی هونەر لە سەر لارێكانیدا دەدۆزینەوە تەنها فریای بۆنێكی دەكەوین.
دەزانی زۆر قورسە باس لە سەرجەم ئاستی هونەری میللەتێك بكەی لەكاتێكدا كەمترین (داتا)ت لەبەردەستدا بێت، ناشمەوێت مەزاجی خۆم سەرپشك بكەم بۆ هەڵسەنگاندنی ئەو ئاستانە، تەنها هەستێكم لا سەركەشە ئەویش ئەوەیە كە زۆر نیگەرانم لەوەی روو دەدات.
* هەندێك باسی قەیرانی هونەری كوردی دەكەن تۆ قەیرانی گۆرانی موزیكی كوردیدا لە چیدا دەبینیتەوە ؟
- پێشتر ئەوەم وتوە كە ئەمەی ئێستا هەیە پێی ناوترێت قەیران، بەواتای ئەوەی شتێكی درەوشاوەو گەورە لە هونەری كوردیدا نەبووە تا ئێستا قەیرانی بەسەردا هاتبێت، بە بۆچوونی من هەموو كزی و لاوازییەك لە هونەری كوردیدا درێژكراوەی مێژووی خۆیەتی.
* ئایا خۆبەستنەوە بە فۆلكلۆرەوە بەسە بۆ ئەوەی هونەری كوردی بەرەو پێش بەرین ؟
- فۆلكلۆر بەشێكی گەورەو زیندوی هەموو میللەتێكە، خەرمانێكی بەجێماوو گەنجینەیەكی پیرۆزی هەموو نەتەوەیەكە، پاراستن و بەرز راگرتنی ئەركە لەسەر هەمووان، پێویستە ئەرشیفكردنی زانستیانە بێت و مامەڵەی هونەریش لە تەكیدا لەو پەڕی ئاست بەرزیدا بێت، بە داخەوە ئەوەی هەیە بەو جۆرە نییە، وای لێهاتووە كە ئەم گەنجینە پڕ بەرەكەت و پیرۆزە بۆتە زەخیرەی زۆرێك لەوانەی كە هێزی ئیشكردنیان نەماوە لە رووی ئاوازی نوێ و بیركردنەوەی نوێ و كاری داهێنەرانە، هەر كەسە لەخۆیەوە و بێ لێپرسینەوە دەست دەباتە ئەم كەرەسە گەورەیەی میللەت و بە شێوەیەكی ناجۆر دەیكاتە بەرهەمێكی هونەریی و لەسەر هونەری كوردیش ئەژمار دەكرێت.
* بینەری كارە هونەرییەكانی ئێوە خەڵكانی نوخبەی كۆمەڵگەن، واتا كارەكانت لە خەڵكانی نوخبەدا ڕەنگی داوەتەوە، وای بۆ دەچم تەنیا بۆ خەڵكانی نوخبەی گۆمەڵگە كار دەكەن، ئەگەر وایە مەبەست لەم شێوە كار كردنە لە بواری هونەردا چییە و ئەتانەوێ چ ئامانجێك لە بواری هونەردا بپێكن؟
- ئەوەی راست بی من كار دەكەم و حەز دەكەم بەركەوتنم لەگەڵ سەرجەم توێژەكان هەبێت، ئەوە ئەوانن بڕیار دەدەن كە گوێ لە من بگرن یان نا، كەواتە من لە سەرەتاوە بەو ئاڕاستەیە كار ناكەم كە كار تەنها بۆ نوخبەیەكی دیاریكراو بكەم، چونكە هەزاران كەس لە شار و گوند و ناوچە جیاجیاكان لە ژن و پیاو لە پیرو جوانان خۆیان كردۆتە هاوڕێی زۆرینەی بەرهەمەكانم و قورسە بەسەرجەم هەموو ئەمانەش بوترێ نوخبە، بەڵام ئەم قسەیەی بەرێزیشتان ئەو راستییە وەدەردەخات كە هونەری گۆرانی و میوزیكی كوردی كەمتر توانیویەتی ویستە هونەرییەكانی بەرجەستە بكات، زیاتر كار بۆ شوناسی جەماوەریبوونی خۆی دەكات كە رەنگە من كڕیاری ئەم مەسەلەیە نەبم و كەمتر بكەومە بەر كاریگەری ئەو شەپۆلانە، ئەمەش وا دەكات من بخاتە بەردەم ئەو شێوەیەی كە وابزانرێت كارەكان كاری نوخبەوی بێت.
* فۆڕمێكی نوی و ستایلێكی تاڕادەیەك كاریگەری گۆرانی عەرەبی لە بواری هونەری كوردیدا گەشەی كردووە، ئێوە لەو ڕووەوە چ قسەیەكتان هەیە ؟
- ئەوە راستە، زۆرێك لە تێكەڵبوون لەگەڵ هونەری نەتەوەكانی تردا بەرچاو دەكەوێت، ئومێدمە لە سەر شانی بنچینەی ئەو رەنگ و بۆنە كوردییەی خۆمان نەبێت كە دەبینرێت هەموو میللەتێك ئەو رەنگ و بۆن و تامە دەكاتە هەوێنی كارەكانی خۆی، من هەمیشە وتومە ناكرێت دەرگاكان لەسەر خۆمان دابخەین، بەڵام ناشكرێت ئاڕاستەی ئیشكردنمان بە پێچەوانەی شوناسی نەتەوەییمانەوە بێت.
* كارەكانتان لە ستایلی یۆنانییەوە نزیكەوە، ئایا ئەمە لە چ ڕوانگەیەكەوە خزمەتی هونەری كوردی دەكات و چۆن بیرتان لە هەڵبژاردنی ئەو جۆرە شێوازە لە هونەری كوردیدا كردۆتەوە ؟
- پێموانییە ئەم رایە نزیك بێت لە راستییەوە، چونكە من زۆر ئاشنا نیم بە میوزیكی یۆنانی و بە راشكاویش دەڵێم زۆر گوێی لێ ناگرم..
دەشمەوێت شتێك بۆ بەرێزتان و سەرجەم خوێنەران راست كەمەوە، كە هەر لە ناو یۆناندا وەك سەرجەم میللەتانی دنیا دەیان و سەدان ستایل هەیە.
لە دوا جاردا من دەمەوێت هونەرێكی جوان پێشكەش بكەم ئەگەر ببێتە خزمەتێك بۆ نەتەوەكەم ئەوا شادمانم خۆ گەر بە پێچەوانشەوە بوو، ئەوا دەكرێت وەلای بنێن.
• وەكو ئەوەی بەڕێزتان لە بواری هونەردا پێشنیارو نووسین و ڕەخنەتان دەبینرێت تاچەند پێتان وایە ئێمەی كورد لە بواری نووسین و ڕەخنەی هونەری نووسەری جدیمان لە بوارەكەدا هەیە و ئایا تاچەند پێویستمان بە ڕەخنەگری جدی هەیە لە بوارەكەدا؟
-نووسەرمان كەمە و جێگای داخە، ئەمەش دەرگای واڵا كردووە بۆ زۆر شت لەسەرووی هەمویانەوە نووسین و رەخنەی بە مەزاج و بێ بنەما و كەم ئەرزش، نووسینێك كە تەنها پەلهاویشتنە بۆ دەرگا لاوەكییەكانی تر، دوور لە هێڵە سەرەكییەكە كە هونەرەكەیە، واتە كەمجاران نووسینێك دەبێتە بابەتێكی سەرنجڕاكێش و پڕ بایەخی هونەریی كە قسە بكات لەسەر بنەماكانی ئەو بەرهەمە لە رووی سەرجەم پێكهاتە بەشدارەكانی هەر لە میلۆدی و میوزیك و تێكست و ئەدا و تەكنیكی دەنگ و تا وردەكارییەكانی تری ئەو بەرهەمە، ئێمە زۆرینەمان تەنها لە یەك رەهەندەوە دەنووسین ئەویش برینداركردنی كەس و كەسایەتی هونەرمەندە و هێنانە خوارەوەیەتی بۆ ئاستی سووكایەتی پێكردن، كە ئەمەش نە نووسینەو نە رەخنە، بەڵكو شەڕێكی دەستەو یەخەیە لە ژێر ناوی رەخنەی هونەری .
* زۆرجاران باس لە كارە هونەرییە جدییەكان دەكرێت بەوەی لەلایەن جەماوەرەوە پڕ فرۆش نین، بۆ نموونە ڕەنگە سیدی هونەرمەندێك كەوا كارەكانی پڕۆفیشناڵ بێت لە سێ چوار هەزاردانەیەك زیاتر فرۆشی نەبێت كەچی لە هەمان كاتدا گۆرانیبێژێكی نا ئەكادیمی بە سایزەرێكەوە گۆرانی دەڵێت ڕەنگە فرۆشی سیدییەكەی لە 30/40 هەزار زیاتر بێت، ئەمە لای تۆ بۆچی دەگەڕێتەوە؟
- ئەمە درمێكە تەنها لێرەدا بڵاو نەبۆتەوە بەڵكو لە زۆرینەی وڵاتانی دنیا بەر بڵاوە، بەڵام ئەوەی ئێمە لەوان جیا دەكاتەوە ئەوەیە كە لە وڵاتانی تر میدیا جدییەكان نابنە ریكلام بۆ كاری ناشایستە، بەدەگەمەن ئەو هونەرمەندە ناجدییانە لە تیڤییەكانیانەوە دەردەكەون، كە تەواو پێچەوانەی لای ئێمەیە..
*كەی بیسەری كورد دەگاتە ئەو ئاستەی كاری پرۆفسشناڵ لەكاری دیكە جیا بكاتەوە؟
- ئەو كاتەی دامەزراوە هونەرییەكانی كورد توانی پێگە و حورمەتی هونەر لە وڵاتەكەدا باڵا تر بكات لەو بارە دژوارەی ئێستا پێیدا تێپەڕ دەبێت.
ئەو كاتەی كەسایەتی مەعنەوی هونەرمەند بەرزتر بوو لە هەموو پلەو پایەیەكی وەزیفی حیزبی و دەوڵەتی بۆ ئەوەی چیتر هونەرمەند نەبێتە كۆیلەی ئیشێك، وەزیفەیەك كە هی ئەو نییە.
ئەو كاتەی زمانی میوزیك باڵاتر بوو لە زمانی جەنگ و زمانی جنێوو سەنگەر لەیەكگرتن.
دەزانی مێژووی گوێگرتنی ئێمە مێژووی گوێگرتنە لە فەرهەنگی جنێوی پارتە سیاسییەكان بە یەكترو مێژووی هەڕەشە و زەنگی شەڕ، ترسی شەڕ، ترسی تەقینەوە لە هەر ئان وساتێكدا، مێژووی گوێهەڵخستنە بۆ درۆكان كە رۆژانە نازانین چ هەواڵێك راستە، كام وشە ئاوادانی ئەم رۆحە تەزیوانەیە، ئەمە مێژووی گوێگرتنی ئێمەیە، ئێمە دەریایەك ئاومان پێویستە بۆ شتنەوەی گوێكانمان بەهەموو ئەو ناشرینیانەی كە ساڵەهایە تێ دەئاخنێن.
*گەلێك تیپی هونەری لێرەو لەوێ هەن، ئێوە وەكو بەڕێوەبەری هونەرەكانی موزیك لە سلێمانی بەرنامەو پڕۆگرامتان چییە و چ میكانیزمێكتان بۆ كۆكردنەوەی ئەو هونەرمەندانە لە بەر دەستە، بە شێوەیەكی گشتی بەرنامەو پڕۆگرامی ئێوە چییە وەكو حكومەت و لایەنی بەرپرس چۆن كار دەكات؟
- بەر لەوەی وەك بەڕێوەبەری هونەرەكانی موزیك لە سلێمانی بمانەوێت باس لە ئەجندای كارەكانمان بكەین پێویستە وەزارەتی رۆشنبیری و لاوان پێمان بڵێت ئاڕاستەو ئەجندای ئەوان چییە؟
كە ئێمە بەشێكی هێجگار بچووكین لە كۆی سەدان بەرێوەبەرێتی ئەو وەزارەتە، بەراستی دیسانەوە پەستم كە بمانەوێت زۆر كاری گرنگ دەتوانین بكەین و زۆر دەست و پێوەندی تەعلیماتی رێگرە لەبەردەم كارەكان یان بەو شێوەیە نییە كە داواكراو بێت یاخود ئەوەندە بە هێواشی دەڕوات كە دوای جارێك ئیشكردن تۆبە دەكەی بۆ ئیشی تر.
*ئێستا ماوەیەكی زۆرە دەنگ و باسی كاری هونەریتان نییە ئەم بێدەنگییە هۆكارەكەی چییە ئەی پڕۆژەو بەرنامەی نوێتان چییە ؟
• - لە پشت هەموو بێدەنگییەكەوە هەرای ئیشكردن و بەردەوامی هەیە، من بەردەوامم لە ئیشكردن، بیركردنەوەو كاری جوان و پوخت كاتی دەوێت بۆیە زوو دێمەوە لاتان چاوەڕوان بن هەڵگری دەیان كاری شایستەم بە ئێوە.

gulan-media

سەیــــرترین تــاوەر لــە جیـــهان

aba_ashq2009 — Tue, 20 Apr 2010 11:47:38 GMT

كارە سەیرەكان لە بواری بیناسازی بە چەندین شێوە و دیمەنی سەیر دەردەكەون، پیشەی بیناسازی ئەوەندە پێشكەوتووە، مرۆڤ هەردەم نموونەیەكی سەیری بیناسازی دەبینێ، وەك ئەو چەندین باڵەخانانەی لە جیهان هەن، ئەوەی دەیبینن دەبێـتە یەكێك لە تاورە جیهانییەكان، كە بە سەیرترین تاوەر دادەنرێ.
لە لیجۆی شاری بریكشێر لە بریتانیا بەبۆنەی رێزگرتن لە بنێشت، سەیر نییە لەوێ بنێشتیش رێزی لێدەگیرێ، تاوەرێكی گەورە دروست كراوە لە شێوەی بنێشتی شێوە لوولە، بەرزی ئەو تاوەرە دەگاتە (100) مەتر، شێوەی تاوەرەكە لە شێوەی لوولپێچ وایە، بەمەش دەبێـتە یەكێك لە تاوەرە سەرسوڕهێنەرەكانی جیهان، لە رووی شێوەی دەرەوە كە وەك لوولپێچ وابێ.

gulan-media

فیلمی "ئه‌لیس له‌ وڵاتی سه‌رسورِهێنه‌ره‌كان" پله‌ی یه‌كه‌م به‌رنادات

aba_ashq2009 — Tue, 06 Apr 2010 13:57:04 GMT

ئا: عه‌بدوڵلا چنگیانی
فیلمی " Alice in Wonderland" ئه‌لیس له‌ وڵاتی سه‌رسورِهێنه‌ره‌كان، به‌ماوه‌ی سێ هه‌فته‌ له‌سه‌ر یه‌ك توانی ببێته‌ فیلمی یه‌كه‌می هه‌فته‌ له‌ سینه‌ماكانی ئه‌مه‌ریكا له‌رووی داهاته‌وه‌، ئه‌مه‌ش به‌كۆكردنه‌وه‌ی 34 ملیۆن له‌م هه‌فته‌یه‌دا و زیاتر له‌ 265 ملیۆن دۆلار له‌ته‌واوی سێ هه‌فته‌كه‌دا.
فیلمه‌كه‌ وه‌ك ته‌واوی ئه‌و جۆره‌ فیلمانه‌ له‌ ده‌رهێنانی كۆمپانیانی جیهانی "دیزنیی" كه‌بایه‌خێكی زۆر ده‌دات به‌ رۆمانانه‌ی تایبه‌ت بۆ منداڵ نوسراون، هه‌ربۆیه‌ 80% ته‌ماشاكه‌رانی ئه‌م فیلمه‌ له‌خوار حه‌ڤده‌ساڵه‌وه‌ن، و ئه‌مه‌ش دۆزینه‌وه‌یه‌كی زیره‌كانه‌یه‌ بۆ بزنس كه‌وا بتوانی هه‌ستى منداڵ و مێردمنداڵ بۆخۆت رابكێشی.
فیلمه‌كه‌ به‌ فیلمه‌ ئه‌نیمه‌یشنه‌ سێ ره‌هه‌ندێكان ده‌ژمێردرێت به‌ڵام وه‌ك فیلمی ئه‌ڤاتار دیمه‌نی راسته‌قینه‌ی له‌گه‌ڵ تێكه‌ڵ كراوه‌، و ورده‌كارییه‌كی ئێجگار جیاواز له‌ فیلمه‌ سێ ره‌هه‌ندییه‌كانی پێشخۆی كراوه‌ كه‌ به‌مه‌ش ده‌بێته‌ فیله‌كه‌ ناوازه‌ ده‌كات.
فیلمی ئه‌لیس له‌ وڵاتی سه‌رسورِهێنه‌ره‌كان له‌ رۆمانێكی رۆماننوسی له‌ناوبانگی ئینگلیزی "لویس كارۆڵ" وه‌رگیراوه‌ كه‌ به‌هه‌مان ناونیشان نوسیویه‌تی، و به‌یه‌كێك له‌شاكاره‌ ئه‌ده‌بییه‌كانی ئه‌و وڵاته‌ ده‌ژمێردرێت.
فیلمه‌كه‌ باس له‌ گه‌رِانه‌وه‌ی ئه‌لیس-ى ته‌مه‌ن 19 ساڵ ده‌كات بۆ جیهانه‌ سیحری و ئه‌فسوناوێكه‌ی، كه‌ له‌گه‌ڵ هاورِێ كۆنه‌كانی یه‌كده‌گرن، كه‌وا چاره‌نوسی راسته‌قینه‌ی خۆی ده‌زانێت، ولێره‌وه‌ به‌ره‌نگاربونه‌وه‌كانی ئه‌لیس ده‌ستپێده‌كات و باسه‌كانی فیلمه‌كه‌ له‌دووای یه‌ك دێن.
فیلمه‌كه‌ له‌ ده‌رهێنانی "تیم بۆرتۆن"ـه‌، له‌پاڵه‌وانێتی خانمه‌ ئه‌كته‌ری به‌ناوبانگی ئوستراڵی "میا واسیكواسكا" له‌گه‌ڵ هه‌ریه‌ك له‌ ئه‌كته‌ران "جۆنی دیب، و ئان هاساوی، و هیلینا بونهام كارته‌ر" رۆڵی پاڵه‌وانێتی فیلمه‌كه‌یان گێرِاوه‌.
ئه‌مه‌ش ته‌واوی باشترین فیلمه‌كانی ئه‌م هه‌فته‌یه‌ی ئه‌مه‌ریكا به‌پێی په‌یداكردنی زۆرترین داهات:

1- (Alice in Wonderland)ب 34,500 ملیۆن$، كۆى داهات: 256,800 ملیۆن$، به‌ 3 هه‌فته‌، پله‌ی پێشو:1.
2- (diary of a wimpy kid)ب 21,800 ملیۆن$، كۆى داهات: 21,800 ملیۆن$، به‌یه‌ك هه‌فته‌.
3- (the bounty hunter)ب 21,000 ملیۆن$، كۆى داهات: 21,000 ملیۆن$، به‌یه‌ك هه‌فته‌.
4- (Repo Men)ب 6,151 ملیۆن$، كۆى داهات: 6,151 ملیۆن$، به‌یه‌ك هه‌فته‌.
5- (She's Out of My League)ب 6,015 ملیۆن$، كۆى داهات: 19,954 ملیۆن$، به‌ 2 هه‌فته‌، پله‌ی پێشو3.
6- (Green Zone)ب 5,963 ملیۆن$، كۆى داهات: 24,702 ملیۆن$، به‌ 2 هه‌فته‌، پله‌ی پێشوو:3.
7- (Shutter Island)ب 4,755 ملیۆن$، كۆى داهات: 115,770 ملیۆن$، به‌5 هه‌فته‌، پله‌ی پێشو: 4.
8- (Avatar)ب 4,000 ملیۆن$، كۆى داهات: 736,881 ملیۆن$، به‌14 هه‌فته‌، پله‌ی پێشو:4.
9- (our family wedding)ب 3,800 ملیۆن$، كۆى داهات: 13,668 ملیۆن$، به‌2 هه‌فته‌، پله‌ی پێشو:6.
10- (Dear John)ب 3,300 ملیۆن$، كۆى داهات: 13,900 ملیۆن$، به‌2 هه‌فته‌، پله‌ی پێشو:5.
gulan_media

با سەوزە و میوە لە ژەمی رۆژانەدا زۆر بێ

aba_ashq2009 — Tue, 06 Apr 2010 13:49:30 GMT

سەوزە Vegetables و میوەكان Fruits سەرچاوەی دەوڵەمەندن بە ڤیتامینەكان، كانزاكان، مادە دژەئۆكسانەكان، ریشاڵی رووەكی، رێژەیەكی بەرزی ئاو، كاربۆهیدرات، چەورییە باشەكان (چەورییە ناتێرەكان Unsaturated fats). سەوزە و میوەكان تا رادەیەكی زۆر تەندروستیت دەپارێزن لە نەخۆشی گەورە و كوشندەی وەكو نەخۆشی دڵ، نەخۆشی شەكرە، رەقبوونی خوێنبەرەكان، بەرزبوونەوەی پەستانی خوێن، قەڵەوی، هەروەها لەچەندین جۆری شێرپەنجە.
هەوڵ بدە رۆژانە بڕێكی باش لە سەوزە و میوە و دانەوێڵە بخەیتە ناو خۆراكتەوە، ئەمەش كارێكی هێندە قوڕس نییە و كاتێكی زۆریشی ناوێت، چەندین هەنگاوی ئاسان و سادە هەیە بۆ ئەنجامدانی بۆ نموونە: سەوزە و میوەی تازە یان فریزبوو (بەستوو) یان قوتووكراو، ئەمانە هەموویان بە پێی گونجانی ژیانی رۆژانەت و كامیان ئاسانتر بێت بیخەرە ناو خۆراكتەوە، هەوڵ بدە كە رۆژانە بەلای كەم سێ جار میوەی جۆراوجۆر بخۆیت، بە تایبەتی لە نێوان سێ ژەمە سەرەكییەكانی خۆراكدا، لەپاش ژەمی خواردن لە جیاتی خواردنەوەی چای میوە دابنێ، لە جیاتی قاوە و سۆدە شیرەی میوەی سروشتی بخۆ، دەتوانیت میوەی وردكراو تێكەڵ بكەیت لەگەڵ ماست، شیر، كاستەر، كێك . هتد، لەگەڵ سوپ و شلەی سەوزەدا، وردە سەوزەی جۆراوجۆر تێكەڵ بكە وەكو گێزەر، تەماتە، بیبەر، سڵق، كەرەوز، بەقدونس(مەعدەنووس)، پونگ، قەرنابیت، پاقلەمەنییەكان، سەڵاتەی تێكەڵاو بەردەوام لەسەر سفرە دابنێ، هەوڵ بدە كە میوەی وشككراویش لە ماڵەكەتدا نەبڕێت وەكو مێوژ، خورما، هەنجیر، كشمش، قەیسی. كەواتە بەم رێگایانە و بە چەندین رێگای ئاسانتریش دەتوانیت بڕی میوە و سەوزە و دانەوێڵەكان لە خۆراكی رۆژانەتدا زیاد بكەیت بە پێی تایبەتمەندی و ستایلی ژیانت.
gulan media

ساندرا پۆلۆك دەتوانێت ئۆسكار بەدەست بهێنێت؟

aba_ashq2009 — Sun, 28 Feb 2010 11:51:39 GMT

خانمە ئەكتەری ئەمریكی ساندرا پۆلۆك وا رانەهاتووە كە ببێتە ئەستێرەی دابەشكردنی خەڵاتەكانی هۆڵیۆد، ئەمەش لەوانەیە بۆ ئەوە بگەڕێتەوە كە ساندرا تا ئێستا رۆڵی وا سەرەكی پێ نەسپێردراوە كە بەهرە و توانا راستەقینەكانی بەدەر بخات.
بەڵام وا پێدەچێت كە ساندرا چانسی گەڕابێتەوە ئەویش لە رێگای ئەو رۆڵەی كە لە فیلمی (لایەنی تاریك - The dark side )پێشكەشی كرد، چونكە دوای بە دەستهێنانی خەڵاتی باشترین ئەكتەری ئافرەت لە ئاهەنگی دابەشكردنی خەڵاتەكانی (هەڵبژاردەی گەل)، چەندین خەڵاتی تریشی بەدەستهێنا وەك پاداشتی رەخنەگران و گۆڵدن گلۆب و خەڵاتی سەندیكای ئەكتەرانی لۆس ئەنجلۆس، سەبارەت بەم خەڵاتانە ساندرا دەڵێ: ئەگەر سەیری كاروانی هونەری من بكەن كەس پێشبینی ئەوەی نەدەكرد لەم رۆڵەدا بمبینێت، ساندرا دانی بەوەش نا كە زۆر جار بۆی زەحمەت بوو خۆی بە ئەكتەر دابنێت و گوتی: من پێشبینی ئەوەم دەكرد كە لە فرۆكەخانە یان لە چێشتخانەیەك كار بكەم، بۆیە بۆ ماوەی دوو ساڵ لە نواندن دوور كەوتمەوە و فێری ئەوە بووم چۆن رۆڵە ئاساییەكان رەت بكەمەوە، هەرچەندە بەدەستهێنانی ئەم خەڵاتانە ساندرا دەپاڵێوێت بۆ بەدەستهێنانی ئۆسكار، بەڵام ساندرا لە ئێستادا نایەوێ باس لەم بابەتە بكات.
سه‌رچاوه‌ گوڵان

نازێ عەزیزی: تائێستا هیچ بێڕێزییەكم بەرامبەر نەكراوە

aba_ashq2009 — Sun, 28 Feb 2010 11:41:17 GMT

ونەرمەندی رۆژهەڵاتی كوردستان نازێ عەزیزی خەریكی بڵاوكردنەوەی بەرهەمە نوێیەكەیەتی كە بڕیار وابوو بەر لە ماوەیەكی زۆر بڵاوی بكاتەوە، بەڵام لەبەر چەند هۆكارێك بڵاونەكرایەوە، بۆ باس كردنی ئەم مەسەلەیە بە پێویستمان زانی ئەم دیمانەیەی لەگەڵدا ساز بكەین.
* نزیكەی شەش مانگ لەمەوبەر پێت گوتین بەم نزیكانە ئەلبوومەكەم بڵاو دەبێتەوە، هۆی دواكەوتنی بڵاوبوونەوەی چییە و كەی بڵاو دەبێتەوە؟
_ بە دڵنیاییەوە لە نەورۆز ئەلبوومەكەم بڵاو دەكەمەوە، ئەو كاتە حەفت تراكم تۆماركردبوو، لەماوەی ڕابردوودا سێ گۆرانی تریشم تۆمار كرد، بەهۆی موزیكژەنەكانەوە سیدیەكەم دواكەوت، ئەوان هۆكار بوون.
* كێ بەرهەمەكەت بڵاو دەكاتەوە؟
_ كۆمپانیای چوار چرا، كلیپێكم تەواو كردووە و ئێستا سەرقاڵی وێنەگرتنی كلیپێكی ترم، چوار گۆرانی كلیپ دەكەم، یەكیان بڵاو بۆتەوە و ئەوی تریان ئێستا خەریكی كۆتایی هێنانم بە وێنەگرتنی، دوو كلیپەكەی تریش بەم نزیكانە كارەكانی ئەنجام دەدەم، بەڵام نازانم ئایا پێش بڵاوبوونەوەی سیدیەكە پەخش دەكرێن، یان دواتر. هەموو ئەو گۆرانیانەی كە كلیپیان بۆدەكەم، لەسیدیە نوێیەكەمدان.
* گۆرانی گوتن لەلایەن ئافرەتەوە تاڕادەیەك قورسە لە كۆمەڵگەی كوردیدا، تۆش جگە لەمە لە كەسوكارت دووری و لەپارچەیەكی تر دەژیت، ئەم بارودۆخە كاریگەریەكی چۆنی لەسەر تۆ هەبووە؟
_ دەتوانم بڵێم كاریگەریەكی ئەرێنی بوو، من كە هاتمە باشووری كوردستان وام دەزانی دەتوانم بگەڕێمەوە بۆ ڕۆژهەڵات، بەڵام نەمتوانی لێرە شتی جوان و باش فێربووم و ئارامییەكی زۆرم بەدەست هێناوە، شتێكم بەدەست هێناوە كە لە هیچ شوێنێكی دنیادا نەمئەتوانی بەدەستی بێنم، ئەویش وەكو ئارامی لەڕووی دەروونیەوە.
* زۆر لەوانەی ڕەخنە لە ئافرەتە هونەرمەندەكان دەگرن و قسەیان بەدوادا دەكەن خۆیان بە تێگەیشتوو دادەنێن، لەوانەیە بۆ كەسێكی ئاسایی ئەمە ئاسایی بێت، بەڵام تۆ چی بەوانە دەڵێیت كە ڕۆشنبیرن و ئەو قسانە دەكەن؟
_ وەك دەزانن من كەم قسەم بەدواوەیە، بەڵام سەبارەت بەوانی تر پێم وایە هۆیەكەی بۆ ئەوە دەگەڕێتەوە كە پیاوە ڕۆشنبیرەكان ئەوەیان پێ قبوڵ ناكرێت كە ژنی ڕۆشنبیری وەك خۆیان هەن، هەمیشە پێیان خۆشە خۆیان قسەی یەكەم بكەن. دەیانەوێت ئافرەت بچەوسێننەوە، زۆربەیان ناتوانن ببینن كە ژنیش دەتوانێت بیربكاتەوە، هەندێ لەئافرەتە هونەرمەندە كانیش سنوورەكانیان بەزاندووە، پێویستە ئەو ئافرەتانە بە ڕۆشنبیریەكی واقیعی كاربكەن نەك تەنها بە جلوبەرگ خۆیان بنوێنن.، ئەگەر بەو شێوەیە بێت بڕوا ناكەم تووشی كێشە ببن.واتە دەتوانم بڵێم هەندێ ئافرەت هۆكارێكن كە بەو شێوەیە سەرنجیان بدرێت.
* لەوڵاتانی دەوروبەر ئافرەت لە شوێنی تایبەت لە یانە و دیسكۆكان گۆرانی دەڵێت، پێت وایە ئەو دیاردەیە ئەگەر لە كوردستان هەبێت، پێت چۆنە؟
_بە بڕوای من ئەگەر كەسێك ئیشی گۆرانی گوتن بێت، ئەوە زۆر ئاساییە لە ئاهەنگ و بۆنەكاندا گۆرانی بڵێت، ئەی ئەگەر بەوە پارە پەیدا نەكات بە چی پارە پەیدا بكات. ئەگەر ئیشی ترم نەبووایە منیش لەئاهەنگەكان گۆرانیم دەگوت.
* ئێستا دیاردەیەكی نوێ لەناو هونەری كوردیدا دەبینرێت ئەویش سەما و خۆ نمایشكردنە، تۆ ئەوە چۆن دەبینیت؟
_ئەوە شێوەیەكی تری هونەرە، ئەوانەی دەنگیان سەرنجڕاكێش نییە هەوڵ دەدەن بە جۆرێكی تر سەرنجی خەڵك بۆ خۆیان ڕابكێشن واتە بە وێنە نەك بە دەنگ. بەڵام ئەوە لەهونەر دوورە، من ئەوانەم پێ دەنگ نییە، دەنگ كەسایەتی مرۆڤە،لای من كەسایەتی ئافرەت و هونەرمەند لەپێش هونەرەوە دێت. ئەوانە ناتوانن بە خۆیان بڵێن هونەرمەندە دەبێت كۆمەڵگە نازناوی هونەرمەند بەوانە ببەخشێت كە گۆرانی دەڵێن نەك بە ویستی خۆیان بە هونەرمەند خۆیان بناسێنن. خەڵك هەیە تەماشایان دەكات لەبەر ئەوەی خەڵك حەزی لەنوێگەرییە، بەڵام خەڵكی هونەرمەند ئەوەی پێ هونەر نییە.
* بە ڕای تۆ ئەوە نوێخوازییە، ئەگەرنا چ ناوێكی تری لێ دەنێی؟
_ئەوە پاشماوەی فەرهەنگی ئەوروپایە، ئێستا كاتی ئەوەیە خۆمان وەك میللەتی كورد بە جیهان بناسێنین، چونكە بە هێنانی فەرهەنگی ئەوروپا كەس ئێمە ناناسێت،كاتی ئەوە هاتووە خۆمان بناسێنین بە جلوبەرگ و موزیك و فەرهەنگی خۆمان، نەك لاساییكردنەوە. ئەوە هەموو پاشماوەی ئەوروپییەكانە دەیهێنن بۆ ئێرە بەو شێوەیە فەرهەنگی خۆمان ون دەبێت.
* ئەی كێ بەرپرسیارە؟
حكومەت بەرپرسیارە، پێویستە سانسۆرێكی تەواو بكرێت بۆ ئەو كارە. ئەگەر بەرپرسی تەلەفزیۆنەكان كەسی هونەرمەند بن كە بەداخەوە هیچ بەرپرسێكی تەلەفزیۆنی هونەرمەند نین، ئەگەر كەسێكی هونەرمەند بەرپرس بێت دەزانێت هونەر چییە، لەهەمان كاتدا هونەری كوردی پێشكەش دەكات نەك پاشماوە و لاساییكردنەوە،ئەو كچانە ماوەیەك بە دیاردەكەون دواتر ون دەبن و كەس باسیان ناكات.
* ئەگەر تەلەفزیۆنێك هونەری نەبێت چۆن دەتوانیت بڵێی پێویستە بەڕێوەبەرەكەی هونەرمەند بێت؟
_ تەنیا بۆ نموونە ئێستا یەك تەلەفزیۆنی هونەریمان هەیە ئەویش كۆڕەكە، بەڕێوەبەرەكەی بەتەواوی هونەرمەندێكی دڵسۆز و نەتەوەیی بێت دەمانتوانی تا ئەندازەیەك بەرەو پێشچوونێك بەدی بهێنین. لەباكوور و ڕۆژهەڵات و ڕۆژ ئاوا ئێستا خەڵك خاوەنی هونەری ڕاستەقینەیە، چونكە ئەوان خەبات ئەكەن بۆ كلتووری خۆیان، لێرە كەسانێك كە لەدەرەوە هاتوونەتەوە وا دەزانن كوردستان یەك پارچەیە، كوردستان چوار پارچەیە و بیروبۆچوونەكانیش لەپارچەیەكەوە بۆ پارچەیەكی تر جیاوازن، ئێستا لەپارچەكانی تر شەڕی كلتوور و زمانە لەگەڵ دوژمنانی كورد، بەشێكی كوردستان ئازادە و سێ بەشی ئازاد نییە، دەبێت ئەو هونەرمەندانە دڵی ئەو سێ پارچەیەش ڕابگرن، ئەگەرنا هیچ شتێكی وایان لەدوا بەجێنامێنێت.

* بە ڕای تۆ لە كام پارچەی كوردستان هونەر زیاتر پێشكەوتووە و ڕووی ڕاستەقینەی هونەری كوردی پیشان دەدات؟
_من ناتوانم وەڵامی ئەو پرسیارەت بدەمەوە، هەموو پارچەیەك هونەرمەندی زۆر باشی هەیە و من پسپۆر نیم لەو بوارەدا تاكو وەڵامی ئەو پرسیارەت بدەمەوە،
* تۆ جگە لەوەی هونەرمەندی لەهەمان كاتدا ئەندازیاری كشتوكاڵیشی،ئەم دوو كارە لەیەكتر دوور نین؟
نەخێر، من دڵم بە سەوزایی،سروشت، گوڵ، باران و ئاو دەكرێتەوە، پێم وایە هونەریش بەشێكە لە من و تێكەڵی من بووە.
* تۆ بەتەنها دەژیت لێرە؟
بەڵێ، جار جار دایكم سەردانم دەكات لە كۆنسێرتی سەری ساڵ هاتبوو،بەڵام من تا ئێستا نەچوومەتەوە.
* دەزانین كاتی خۆی مەلەوان بوویت، ئێستا چۆنیت لەگەڵ وەرزش و مەلەوانی؟
_ئێستاش باشم، بەڵام وەك جاران وەرزش ناكەم تەنها هەندێك جار مەلەوانی دەكەم. من سوارچاكیش دەزانم. وەكو حەز و ئارەزووی خۆم وەرزش دەكەم.
* زیاتر كێ هاوكاری كردوویت لەڕووی مەعنەوییەوە؟
_كاك عیرفان زەنگەنە، هانی دام و زۆر یارمەتی دام، ئەوشەو لەبەرنامەیەكیش ئاماژەم پێدا كە بێ بەرامبەر یارمەتی هونەرمەندانی داوە،ئەو زۆر بایەخ بە من دەدات.
* زۆرجار دەبیستین كە ئافرەتی كورد دەبێت قوربانی بدات بۆ ئەوەی بەردەوام بێت لەكارەكەی، تۆ قسەت چییە لەسەر ئەم بابەتە؟
_زۆر ڕاستە، ئەو هەموو كچە گۆرانیبێژانە نموونەن، ئەوەش هەمووی كاریگەری فەرهەنگی عەرەبییە كە زاڵە بەسەر فەرهەنگی ئێمەدا،تا ئێستا هیچ بێڕێزییەك بەرامبەر من نەكراوە و كەسایەتی خۆم پاراستووە. لەهاویندا یەك دوو گۆرانیبێژ هاتن ئەوەندەیان كاری ناحەز كرد كاری وایان كرد ئەگەر دەهاتنە لام پێم شەرم بوو بڵێم گۆرانیبێژم، دەم گوت من خوشكی نازێ عەزیزیم من هونەرمەند نازێ نیم، مەبەستم ئەو جیلە نوێیەیە بەڕاستی ناوی گۆرانیبێژیان سووك كردووە. ئەوەش بۆ ئەو ئافرەتانە دەگەڕێتەوە نەك بۆ بەرامبەرەكانیان. بۆچی من جوان نیم، من خۆم پێ لەوان جوانترە، بەڵام ڕێ بە خۆم نادەم ئەو كارانە بكەم. من هونەر دەكەم و كەسایەتی خۆم دەپارێزم و خەبات بۆ هونەرەكەم دەكەم، كەسایەتیشم پاراستووە، پارە كۆدەكەمەوە و پارەی كرێی خانوو دەگێڕمەوە ئەیدەم بە گۆرانی، جاری وا هەبووە لەهاویندا بەو گەرمایە پارەی تەكسیم پێ نەبووە بەپێ چوومەتە سەر كار، پارە كۆدەكەمەوە لەپێناوی گۆرانیدا، كەچی ئەوانەی لەئەوروپا دەگەڕێنەو باشترین هۆتێلیان بۆ دەگیرێت، دەبێت باجی ئەوانە بدەیت، بۆچی بۆ ئەوان هەیە و بۆ من نییە، من لەژیانم دا نەمبینیوە دەفتەر یانی چی، بۆچی ئەوانە بە دەفتەر پارە وەربگرن، دێنەوە بە كەیفی خۆیان ئێرە تێكدەدەن و دواتر دەچنەوە. من ئەگەر ئەو قسانە دەكەم هاواری خۆم نییە،چەندین هونەرمەندی ئافرەت هەیە كە لەبیر كراون. ئێرە كوردستانە ئەمریكا و ئەوروپا نییە، لەوێش ئەوانەی ئەو كارانە دەكەن پێیان دەگوترێت بەرەڵڵا، بەڵام كەسێك خاوەنی كەسایەتی و فەرهەنگ و كلتووری خۆی بێت، نە قسەی بە دوادا دەكرێت و نە ڕێگەش دەدات قسەی بەدوادا بكەن.ئەوانە ئیشیان هونەر نییە، ئەوە گوناهێكی زۆر گەورەیە هونەرمەندان وەلانراون و ئەوانەی ئیشیان هونەر نییە بە كەیفی خۆیان ئەوەی بیانەوێ بەناوی هونەر دەیكەن. پێم وایە ئەوە زۆر ناخایەنێت و حكومەت چارەسەری بۆ دەدۆزێتەوە.
* چارەسەرەكە چییە؟
_خەرج نەكردنی پارە بە دەفتەر بۆ ئەوانەی لەدەرەوە دێنەوە، بۆچی حكومەت یارمەتی هونەرمەند بدات، هونەر شتێكی شەخسییە، بۆچی ئێمە دەست پان بكەینەوە بۆ حكومەت داوای هاوكاری لێ بكەین.لەهەشتاكان ئەو هونەرمەندە باشانە هەبوون ئەو كاتە كەس نەبوو پارەیان بداتێ، بە خەباتی خۆیان دەیانكرد. ئێستا هی وادەناسم نازانێت بە كوردی قسە بكات كەچی وەك هونەرمەند دەیناسێنن. بەڵام میللەتی ئێمە زۆر زیرەك و ئاقڵە، دوای ماوەیەكی تر گەنجانی ئێمە دەزانن هونەری كوردی چییە و دەگەڕێنەوە بۆگوێگرتن لە هونەری ڕاستەقینە، خەڵكی ئێمە لەوە وشیارترە كە بڕوا بە قسەی هەندێك لەوانە بكات.
سه‌رچاوه‌ گوڵان